專訪健美小姐Cathy Luk 運動自救擺脫嚴重濕疹 由藥煲變健身教練贏回人生

14歲嚴重濕疹至全身異味

Cathy 憶述自己第一次的全身大爆發，是14 歲那一年，「記得當年好嚴重，真係由頭到腳，全身都流血、結痂、脫皮、出水……當年仲係小朋友嘅我，好辛苦，不停越抓越癢，感覺上全身都冇忽好肉！」當時的Cathy 正值中學時期，理應享受無憂無慮的校園生活，卻每天與濕疹搏鬥，「再加上鼻敏感，每日朝早都要『擤鼻涕』，我覺得成個人都好攰，做咩都冇精神，只係想瞓覺。」當時 Cathy 開始由長期使用類固醇藥膏發展至口服類固醇，情況才漸漸穩定下來，但也只是時好時壞。

2013年大爆發現改變契機

當 Cathy 以為一直用藥能控制病情，到了2013年又再一次大爆發，終於令她醒覺，「當時情況仲衰過14歲當時！連腳趾、腳板底都流晒血，流到黏住隻鞋，然後全臉出紅疹，體重開始急升暴肥，身心都好痛苦！」妙齡少女卻在外表上自信全失，加上工作壓力，最後她裸辭休養，自言當時覺得「成個人都機器壞咗」，不停反問自己：「唔通我老佐都仲要每日經歷呢啲『過山車』生活？」

靠運動逆轉人生

依賴藥物多年卻毫無進展，Cathy 開始自覺要靠自己改變命運，「當時我開始積極做運動，又上網不停搵相關資料，睇下點樣可以改善自己身體。」身體的問題令她在運動上由零開始，一開始只能每日進行約20分鐘的簡單運動，堅持兩個月後漸見成效，「開始知道呢個方法對自己係work！咁就有動力繼續落去，慢慢培養出做運動嘅熱誠。」

開始運動之後，我覺得曾經失去嘅活力開始返返嚟！ – Cathy

Cathy 剛開始運動之時，正值濕疹嚴重期，跟所有人一樣，萬事起頭難。「開頭我都係晚飯後先運動半個鐘左右，初期都會擔心身體頂唔頂得順，好幸運地，汗水冇令我不適，反而我覺得好享受專注喺自己身體嘅感覺！」自從開始運動，Cathy 感受到身體的自癒能力被活化，堅持運動亦令她重拾對人生的熱情和積極，「我開始覺得，自己都有能力塑造理想嘅生活！」最後，她用了一年時間戒糖和運動，就能成功擊退濕疹，過回正常的生活。

由藥煲變健身教練

有說人生每一個過程都成就了現在的自己，在Cathy身上，曾經令她痛不欲生的濕疹令她開啟了運動之路，更考牌成為健身教練。曾經的她不敢望著鏡中的自己，重新建立自信後多次參加健美比賽，更曾在世界錦標賽上取得第二名，「以前只係想收埋自己，好返之後我仲去參加比堅尼小姐比賽，突破自己的心理關口！」

人生好有趣，如果冇以前嘅經歷，我未必會成為健身教練。 – Cathy

現在，運動已經成為 Cathy 生活中不可缺少的習慣，堅持每日運動之餘，她的運動計劃也包括了爆發力訓練、心肺功能、力量訓練、穩定性、情緒釋放等等，無論是瑜伽、拉筋、行山、HIIT、重訓，全都是她的「叉電機」！濕疹和運動，塑造出Cathy 堅定不移的個性，「我成日同自己講：『我一定得嘅！』」